Karel

Háttatal — 8. ríma

— Sveinbjörn Beinteinsson

Lemmata | Textatengsl
umgjörð ríman

181.
Ríman

Gróðursælan heimahaga
hylur fannaslæða grá.
Virðist mér um vetrardaga
von og kvíði takast á.

Skoða...

182.
Ríman

Undir mjöllu meginkraftur
moldarlífsins bíður þó
hér við fjöllin hlýnar aftur,
hýrnar jarðargróskan frjó.

Skoða...

183.
Ríman

Man ég prýddu vorsins veldi
veðrin mætu ljúf og hlý.
Dagur skrýddur fögrum feldi
fram á nætur vakti því..

Skoða...

184.
Ríman

Oft um brattan flugstik fjalla
fór ég hratt á stefnumót.
Þá var glatt á grænum hjalla,
gleðin spratt af sælurót

Skoða...

185.
Ríman

Kom til fundar hvíta hrundin,
heillastundin fegurst var,
sæl við undum örmum bundin
ein í lundi ---- Manstu hvar?

Skoða...

186.
Ríman

Langt er síðan svannann blíða
sá ég hlíðum fríðum á.
Enn skal bíða betri tíða,
bægja kvíða stríðum frá.

Skoða...

187.
Ríman

Oft þó hinna fljóða finni
fegurst svinna vinur þinn,
eigi ginnast okkar kynni
öll úr minni fyrst um sinn.

Skoða...

188.
Ríman

Hugur vildi heiman sveima
hróður góðan fljóðið á,
hlýja skyldi hreima geyma.
Háttaþáttinn máttu sjá.

Skoða...

189.
Ríman

Senn ég veit að vorið heita
vermir þetta land á ný.
Burtu leita böl og þreyta.
Bráðum kem ég hvamminn í.

Skoða...

190.
Ríman

Hlynur dvaldi á værðar valdi
vertrarkalda hríðarnótt.
Þegar birtist vera virtist
veðurkyrrt og lygnurótt.

Skoða...

191.
Ríman

Vildi halur heim án dvalar
hefja ferð er dagljóst var,
vera kallar fært á fjallið,
færi bezta sýndist þar.

Skoða...

192.
Ríman

Blæja kuldans hauðrið huldi
hrein í einum lit að sjá,
líkt og hendur himinsendar
hafi vafið allt í snjá.

Skoða...

193.
Ríman

Bóndi segir; „Bústu eigi
burtu héðan flýti með,
bíða sorglaus máttu morguns,
mun þá veður hagstætt léð.

Skoða...

194.
Ríman

Úlfur fetað feginn getur
fram á heiðaleið með þér,
fyrir skata hörku hvata
hjarnið breiða greiðfært er.

Skoða...

195.
Ríman

Þar í góðu gengi drengur
glaður var til næsta dags.
Gafst á meðan mengi fengur
margrar sögu og skemmtun brags.

Skoða...

196.
Ríman

Hildur mild og fegurst fljóða
föður glöðum sat þar hjá,
undi hrund við ljúfra ljóða
lestur gestsins vörum frá.

Skoða...

197.
Ríman

Brag af tíva dáðum dýru
drengur svífa lét um rann,
málið óf af efni skýru
orð af hófi valin fram.

Skoða...

198.
Ríman

Óðins frægð var lýst í ljóði,
lof um Þór var fært í brag,
hróður Freys í fögrum óði
felldur slétt í vandað lag.

Skoða...

199.
Ríman

Freyju veldi um að inna
eigi heldur gleymist þá.
Prýddan hróður helgra minna
hlýddu fljóðin brosleit á.

Skoða...

200.
Ríman

Háttafallið djarft þó dyndi
dátt með harla ramman klið,
snjallan þátt um ástaryndi
allir máttu kannast við.

Skoða...

Háttatal, 8. ríma

næsta ríma >>